Rajasthan CM atan Bhajanlal Sharma ruat

Rajasthan assembly inthlan neih zawh taka rorel lai, Congress party hneha sorkar thar siam tur, BJP chuan nimin khan chief minister atan a ṭum khatna atana MLA-a thlan tlin, state party unit general secretary Bhajanlal Sharma a ruat.

Nimina BJP central observer pathumte hoa BJP legislature party meeting neihah Chief Minister tur hi ruat a ni a, deputy chief minister atan Diya Kumari leh Prem Chand Bairwa-te ruatin, Assembly speaker atan Vasudev Devnani an ruat bawk.

Chief Minister atana ruat, kum 56 mi Bhajanlal Sharma hi MLA-a thlan tlin a nih ṭum khatna ni mah se, an state BJP general secretary hi term li chelh tawhin, he dinhmun chelh rei thei zingah a tel a, 'organisation man' tia hriat a ni zawk ṭhin. Tun ṭum inthlanah khan Jaipur district-a Sanganer bialah thlan tlin a ni.

State assembly inthlan neih zawh takah khan BJP hian inthlan neihna, seat 199 aṭangin seat 115-ah hnehna an chang a, seat pakhatah erawh chuan candidate a thih avangin vote thlak a la ni lo.