Sorkar laipuiin criminal law bill pathumte hnukdawk

Parliament monsoon session neih lai, August 11-a Lok Sabha-a an pharh, criminal law pathum; Code of Criminal Procedure Act, 1898, the Indian Penal Code, 1860, leh Indian Evidence Act, 1872 te thlakna tur atana ruahman - Bharatiya Nyaya Sanhita Bill, Bharatiya Nagarik Suraksha Sanhita leh, Bharatiya Sakshya Adhiniyam bill te chu sorkar laipui chuan a hnukdawk rih tih a puang.

Nimina Rajya Sabha inkhawmah union home minister Amit Shah chuan criminal law bill pathumte chu a zir chiang tura an din, parliamentary panel-in a rawt anga hnuhdawh a nih thu leh, ruahmanna thar siam a ni dawn niin a sawi. Amit Shah hian parliamentary standing committee on home affairs-in zir chianna an neih thu leh, Home Ministry-a official te, Ministry of law and justice member te, mithiam bik te leh dan tharin a nghawng tur mi hrang hrangte nena sawiho a nih hnuah November 10 khan an report buatsaih leh rawtna te an theh luh tawh thu a sawi.

Shah chuan,"August 18 khan bill zir chiang tur hian parliamentary standing committee on home affairs kutah dah a ni a, committee rawtna angin; Bharatiya Nyaya Sanhita Bill, 2023 te, Bharatiya Nagarik Suraksha Sanhita bill, 2023 leh Bharatiya Sakshya Adhiniyam bill, 2023 ah te hian siam ṭhat ngai a awm thu an sawi. Hei vang hian heng bill pathumte aiawh hian bill dang siam turin ruahmanna kan siam ta zawk a ni," a ti.