Congress-in J&K state nihna pek leh inthlan buatsaih thuai phût

Congress party hruaitu pahnih; finance minister hlui, P. Chidambaram leh Rajya Sabha member ni lai, Abhishek Singhvi-te chuan All India Congress Committee (AICC) headquarter-ah press conference neiin, Supreme Court thutlukna avanga Article 370 ṭhiah a nih chungchanga inhnialna chu a tawp tawh thu leh, Jammu & Kashmir chu state nihna pe leh vat a, inthlan buatsaih thuai turin sorkar laipui an phût tih an sawi.

P. Chidambaram chuan Supreme Court thutlukna chu zir chian tham a awm thu sawiin,"Article 370 ṭhiat tura article 367 hman a ni chu an thuneihna piah lam a ni tih hi Supreme Court hian a pawmpui tihna a ni. Hei vang hian zah tak chungin court thutlukna hi keini chuan kan pawmpui ve thei lo a ni. August 6, 2019-a Congress Working Committee resolution hi kan sawi nawn leh duh, article 370 hi constitution phal chin ang taka siam ṭhat a nih hma chuan zah a phu tih hi kan dinna a la ni reng," a ti. Chidambaram hian Supreme Court chuan state nihna ṭhiah a nih chungchang leh Union territory pahniha ṭhen a nih chungchang chu a sawi tel loh thu a sawi bawk.

Abhishek Singhvi hian article 370 leh a dinhmun ang pek leh chu an tum a nih loh thu leh dan hmanga ennawn dilna pawh an siam loh tur thu sawiin, Jammu and Kashmir mipui zawng zawngte duhthusam chu mipui rorelna a nih thu leh, mi pakhat rorelna hnuaia kun a nih loh thu a sawi. Singhvi chuan BJP chu inthlan buatsaih ngam loah a puh bawk.

Supreme Court hian Jammu & Kashmir-in anmahni inrelbawlna tura dan an neih article 370 kum 2019-a ṭhiah a nih chungchanga petition a ngaihtuah a, Thawhṭanni khan thutlukna siamin, article 370 ṭhiah chu dan hnuaiah pawm theih a nih thu a tarlang a ni.