WB-a land policy avangin ramri hung hnathawh a muang

Sorkar laipui chuan Supreme Court hnenah West Bengal sorkarin land policy a hman mek avanga ram chhunga lo lut ru tur ven nana Indo-Bangladesh ramri hung hna thawh mek chuan a tuar thu leh, hna a muan phah thu a hrilh.

Chief justice of India, DY Chandrachud kaihhruai bench hmaah sorkar laipui aiawhtu, Solicitor General, Tushar Mehta chuan Bengal-in ram lak theihna dan a hman chuan hnathawh a tihmuan bakah a tihautak niin a sawi a, ram tana thil pawimawh em em, ramri hung hna thawhnaah pawh West Bengal chu hnawksak an nih thu a sawi. Sorkar laipui chuan ramri chu km 4,096-a thui a nih thu tarlangin, tlang khawkrawk leh lui bakah ngil taka lak theih loh lai a tam thu sawiin, chung ramrite chu West Bengal bakah, Meghalaya, Tripura, Assam leh Mizoram-ah te a awm thu a tarlang.

Mehta chuan,"Ram lakna tura dilna West Bengal sorkar kuta khawtlai mek bakah, state-in Land Acquisition Act, 2023 siam ṭhat a hmang duh lote chu kan harsatna a ni. He dan tharah hian sorkar laipui chuan ram mipuite tana hman tur thilah a duh chuan khawi lai ram pawh a la thei ni. West Bengal-in ram leina tur atana ruahmanna hran a nei hian Bangladesh nena kan inrina veng tura kan hmalakna a tiṭhuanawp a ni," a ti.

Supreme Court hian Citizenship Act hnuaia section 6A khinna petition ngaihtuah mekin, hemi kaihhnawihah hian Bangladesh aṭanga lo lut rute dinhmun hriat leh, sorkar laipui hmalakna te a zawhna chu Mehta hian a chhang a ni. "Ram dang mi India-a lo lut ru zawn chhuah, hren leh thawn let chu thil buaithlak tak a ni. Tunah hian ram chhunga lo lut ru avanga thubuai nuai 3.3 chu chinfel tawh a ni a, pending mek 97,714 a awm bawk," tiin a sawi. West Bengal bik hian Bangladesh nen hian ramri, km 2.216.7 a thui an inṭawm a, Citizenship Act, section 6A hnuaiah hian Bangladesh aṭanga kum 1966 leh 1971 inkara Assam-a lutte chu India khua leh tui nihna pek phal a ni bawk a ni.