CEC leh EC ruat dan chungchang bill Rajya Sabha-in pawm

Rajya Sabha chuan Chief Election Commissioner (CEC) leh Election Commissioner (EC) ruat dan tur chungchanga dan thar; Chief Election Commissioner and Other Election Commissioners (Appointment, Conditions of Service and Term of Office) Bill a pass.

Union law minister Arjun Ram Meghwal chuan bill chu Supreme Court thurawn anga buatsaih a nih thu sawiin,"Vawiin thlengin CEC leh EC ruat chungchangah hian kalphung emaw, dan zawm a awm lo a, he bill hmang hian CEC leh EC ruatna hi langtlang takin kalpui a ni thei tawh dawn a ni," tiin a sawi. Meghwal chuan Commissioner tura ruatte chu sorkar laipuiin a thlan mai ṭhin thu leh, tun aṭang chuan CEC leh EC thlang tur committee-in an buaipui tawh tur thu a tarlang. Bill tharah hian CEC leh EC-te'n an hnathawh laia an thiltih avanga khin theih loh an nihna tur pawh dah tel a ni bawk. He bill hian CEC leh EC te chu Supreme Court judge-te nen dinhmun inang khatah dahin, hamṭhatna leh hlawh inang an nei tawh dawn bawk a ni.

Hetih lai hian eptu party-te chuan CEC leh EC ruatna kawngah Supreme Court hmaih luih an nih thu sawiin, bill chu committee ruat bik kuta dah duh mah se pawm a ni lo thung. Eptu party-te chuan sorkar laipui thil tum chu rinhlelhawm an tih thu sawiin, Congress general secretary, Randeep Singh Surjewala chuan bill chuan India constitution a kalh niin a sawi bawk.