Lok Sabha inkhawm neih lai misualin bei

Parliament thlasik inkhawm neih mek laiin Nilaini tlai khan Lok Sabha chhungah misual parukin meikhu eng vawm lutin, au hla an chham zui bawk. Thudawn danin heng misual paruk zinga panga hi man an ni tawh a ni.

Delhi police officer pakhat chuan Lok Sabha inkhawm beihnaah hian firfiaka chetna lam hawi a awm lo nia an hriat thu sawiin, politics thila inbeihna nia an hriat thu leh, chhui zui hna an thawh chhunzawm nghal thu a tarlang.

Mi panga an mante hi Sagar Sharma, D. Manoranjan, Amol Shinde, Neelam Devi leh Vishal Sharma te an ni. Sagar Sharma leh D. Manoranjan-te hian visitor lehkha hmanga Lok Sabha chhunga an luh hnuah, gallery chung lam aṭanga zuang thlain meikhu siamna hi an vawm a, au hla chi hrang hrang hmangin an au chhunzawm a ni. Anmahni puitu pawn lama an man pathum zinga mi, Neelam Devi hian man a nih hnuah lawkah "Tanashahi nahi chalegi (mi pakhat rorelna hi kan en liam lo ang)" tiin a au chhunzawm ve bawk niin police te chuan an sawi. Heng misualte hi an vai hian social media kaltlanga inchharte an ni hlawm a, 'Bhagat Singh fan club' page aṭanga inhmelhriat an ni hlawm niin police te chuan an sawi bawk. An vai hian hnathawh tur awm lo leh thil man sang zel chu an lawm loh chhan bul niin an sawi hlawm a ni.

Lok Sabha rorel inkhawm beih a nih chungchangah hian Home Ministry chuan Central Reserve Police Force (CRPF) Director-General Anish Dayal Singh kaihhruaina hnuaiah inquiry committee an din tawh thu sawiin, committee hian misualin Lok Sabha bei tura an luh theih dan leh, an beih chhante a chhui chiang dawn a ni. Ministry of Home Affairs chuan committee-in a chhuina report bakah, Parliament-a venhimna siam ṭhat dan tura rawtna an neihte a rang thei ang bera theh lut tura an hriattir thu an sawi. He thil thleng vang hian Lok Sabha-a venhimna hna thawktu mi pariatte chu ban an ni nghal bawk.

Eptu MP 15 suspend an ni

Lok Sabha security palzutna thleng chungchang sawiho phut a, House-a an au bengchheng vangin nimin khan eptu MP 15 chu Parliament winter session neih mek aṭangin suspend an ni.

Eptu MP suspend-te hi Lok Sabha member 14 leh Rajya Sabha member pakhat an ni. Lok Sabha rorel inkhawm lai tihbuai a nih chungchang sawiho leh, union home minister Amit Shah chu thu sawi tura phutin House chhungah an au benchheng a, an chet dan mawi lo tak vanga hrem an ni tih House hruaitute chuan an sawi.