Aadhar leh bank account link loh vangin loneitute ṭanpuina pe lo

Maharashtra sorkar chuan sorkar laipui hmalakna, Pradhan Mantri Kisan Samman Nidhi Yojana hnuaia ṭanpuina pek belh chhah nana state sorkarin ruahmanna a kalpui mekah Aadhar card leh bank account link loh avangin loneitute 96,811 te hnenah ṭanpuina an pe thei lo niin an tarlang.

Maharashtra sorkar hian Namo Shetkari Mahasanman Nidhi Yojana kalpuiin, he hmalakna hnuaiah hian loneitute ṭanpuina sum faia pek tum a nih thu agriculture minister, Dhananjay Munde chuan a sawi. Munde hian state assembly an neih mekah house-ah hian ziaka zawhna chhangin, "PM Kisan Samman Nidhi scheme hnuaia ṭanpuina dawng tura thlan tawh zawng zawng aṭangin kumin Ocotber 26 thlenga aadhar card leh bank account link lo mi 96,811 te hnenah state-in ṭanpuina sum a pek ve tur kan la pe thei lo a ni," a ti.

Munde hian state sorkar chuan ṭanpuina pek theih lohte account leh aadhar link tura hma a lak thu leh, loneitute hi anmahni ngeiin sorkar office an pan ve a ṭul thute sawiin, link tur hi an tifel a nih chuan an sum dawn tur ang chu an dawn chhunzawm mai tur thu a sawi bawk.