Delhi Lt. Governor leh CM-te'n electric bus thar 500 vai liam

Delhi lieutenant governor, VK Saxena leh chief minister, Arvind Kejriwal te chuan nimin khan electric bus thar 500 vai liamin, tun dinhmuah Delhi hian electric bus 1,300 a nei tling tawh a ni.

Delhi transport minister, Kailash Gahlot chuan electric bus thar chungchang hi X-ah post-in,"Delhi tan thu lawmawm a ni. Vawiinah hian mellung pawimawh tak phun a ni leh a ni. Chief minister leh Lt. Governor-te nen electric bus thar 500 vai liam a ni. Hlawhtlinna hi zan khata neih mai chi a ni lo a, rei tak rim taka thawh hmanga neih chi a ni. Delhi chu hmahruitu niin electric bus 1,300 kan nei ta," tiin a tarlang. Thuneitute chuan kum 2025-ah chuan Delhi hian bus 10,480 a neih tawh tur thu leh, chung zinga 80% chu electric bus a nih tawh tur thu te, carbon dioxide siam chhuah pawh ton nuai 4.67 zeta a tlakhniam theih phah tur thu an sawi. Bus tharte hi air-condition vek niin, meikhu leh thawm bengchheng chhuah lo, GPC leh CCTV nei vek an ni.

Kum 2022, January aṭang khan Delhi khawpuiah hian electric bus 800 hman mek a ni a, heng bus-te hian km million 42 aia tam tlan tawhin, carbon dioxide ton 34,000 chuangin an titlem tawh niin an chhut.