Eptu MP-ten Parliament complex-ah lungawi lohna lantir

Etpu ṭangual pawl, INDIA MP-te chuan Parliament winter session neih mek aṭanga eptu MP 14-te suspend an nih vangin nimin khan Parliament complex-ah lungawi lohna an lantir.

Lok Sabha rorel inkhawm neih laia pawn lam miten luhchilh a, an tihbuai chungchang chu eptu MP-te hian House-a sawiho bakah, union home minister Amit Shah pawh thu sawi turin an phut a ni. An thil phut nawra House chhunga an au bengchhen avangin MP 14-te hi Ningani khan suspend an ni. Suspend-te hi Lok Sabha MP 13 leh Rajya Sabha MP pakhat, Trinamool Congres MP Derek O'Brien te an ni.

Nimina lungawi lohna lantirnaah hian Congress party president hlui, Sonia Gandhi pawh a tel. MP hrem tawkte hian thuziakte kengin, thu dik sawi chhuah duha an ṭawng chhuah avanga hrem an nih laiin, misualte House chhunga an luh theihna atana mawhphurtu ber, BJP MP erawh zalen takin a awm thung tih thute an ziak. Congress party chuan misualte hnena visitor pass petu, BJP MP Pratap Simha chu hrem ngei an phut thu an sawi.

Nimina House pahniha rorelnaah pawh eptu member-te hi rorel thei loa an aubuai avangin inkhawm tihtawp a ni bawk.