Purunsen thawn chhuah khap vangin loneitute leh sumdawngte nuar

Sorkar laipuiin December 7-a ram pawna purunsen thawn chhuah khapna a tihchhuah hnuah India rama purunsen thar chhuak tam ber, Gujarata-a loneitute chuan nawrh an huaihawt a, sumdawngte chuan an state chhunga dawr hrang hranga purunsen pek chhuah an titawp ve bawk.

Purunsen thartu leh purunsena sumdawnna kalpuitu nawrh huaihawtte hi Mahuva, Gondal leh Rajkot hmuna mite an ni ber a, sorkar laipuiin purunsen thawn chhuah a khap hnu December 8 zan aṭang khan an lungawi lohna lantir hi an ṭan nghal a ni. Ram chhunga purunsen tamna ber dawttu, Mahuva-ah hian ram pawna purunsen thawn chhuah khap a nih hnuah purunsen zawrh chhuah khap a ni ve nghal bawk. Ningani khan loneitute chuan Gondal-ah National Highway an dang a, purunsen auction-na leh Mahuva leh Gondal APMC-a wholesale-a hralh chhuah a nihna tur chu an titawp. Loneitu lungawi lote hian an thlai tharte an vawm darh bawk a ni.

Gondal AMPC-a nawrh huaihawtte chuan purunsen man a ṭhat veleha thawn chhuah khapna siam a ni chu sorkar an dem thu sawiin, loneitute tana sorkar ṭha lo niin sorkar laipui chu an puh. Mahuva AMPC chairman, Ghanshyam Patel chuan sorkar laipui thutlukna siam chu loneitute laka an thutiam kalh a nih thu sawiin,"Bangladesh-a thawn tura buatsaih tawh purunsente chu a quality sang lo an ni a, thawn chhuah khapna siam a nih hnua an rawn phurh let leh avangin helaia zawrh chhuah hi a huphurhawm tawh hle a ni," a ti. Patel hian prime minister Narendra Modi hnenah lehkha thawnin, purunsen thawn chhuah chungchanga an thuchhuah chuan Guajarat-a loneitute a nghawng nat avangin ennawn turin a ngen.

Purunsen thar tam hunlaia thawn chhuah khapna siam avang hian Gujarat APMC vela purunsen zawrh chhuahna man hi quintal khat Rs. 4,000 aṭangin Rs. 2,000-ah a tla thla nghal a ni. Purunsen man hi loneitute chuan 35% vela a tlak thlak leh an rin thu an sawi bawk.