PM Modi-a'n Pariksha Pe Charcha hmang

Kum tina zirlaite'n board exam an hmachhawn hmaa prime minister Narendra Modi-a'n zirlaite inkawmna hun a hmanpui ṭhin, Pariksha Pe Charcha chu Ningani khan hman a ni.

Prime Minister Modi chuan Pariksha Pe Charcha thil tum ber chu zirlaite rilru hahna hlawhtlinnaa chantir a nih thu sawiin, zirlaite chu nui hmel pu chunga exam hmachhawn thei turin a fuih. Pariksha Pe Charcha-ah hian PM chuan zirlaite nen inkawmna hun hmangin, hmun danga zirlaite tana en turin video a buatsaih ṭhin bawk a ni. Modi chuan zirlaite zawhnate chhangin, exam chungchanga an rilru hahna hmachhawn dan hrilhin, thil dang dang pawh a sawipui ṭhin bawk.

PM hian nimina a hun hmanpuinaah hian Kashi Vishwanath Corridor-in kum hnih a tlin lawmna pualin thu a sawi bawk a,"Kashi hi a ṭhang zel a, kawng hrang hrangah hmasawnna nasa tak hmuh theihin a kal zel a ni. Hmasawnna ruhrel din tur leh, khualzin tan te, sumdawnna leh thil dang dang atan a ṭangkai hle a ni," a ti. India tana hmathlir a neih zinga lehkhabu chhiar ram ni tura an hmalakna kal zelah Pune-in a huhoa lehkha chhiarna lian ber world record an siam chu a lawmpui thu leh, ropui a tih thu a sawi bawk. Pariksha Pe Charcha chu India inpumkhatna lantirna ṭha tak a nih thu Prime Minister chuan a sawi.