Chhattisgarh CM tharin PM scheme hnuaiah in nuai 18 sak tiam

Chhattisgarh chief minister thar Vishnu Deo Sai chuan Ningani khan cabinet meeting hmasa ber kaihruaiin, Pradhan Mantri Awas Yojana hnuaia diltute zawng zawng tan in nuai 18 sak chu hna hmasa berah a neih tur thu a sawi.

Sai hian,"Inthlan campaign laia Prime Minister nena kan sawi dun angin kan sorkar thara kan hna hmasa ber tur chu PMAY hnuaia in nuai 18 sak a ni dawn a ni," tiin chanchinthar lakhawmtute hmaah a sawi. Deo Sai hian inthlan hmaa an thil tiam zinga mi, paddy farmer-te tana bonus pek tur la pek chhuah loh chu December 25-a Prime Minister hlui Atal Bihari Vajpayee pian chamah pek an nih tur thu a sawi bawk. Chhattisgarh-a firfiak pawl lian tak, Maoist-te beih dan tur chungchangah Sai chuan BJP sorkar hmasain kawng an sah kuak tawh zawh chhunzawm a, theihtawpa firfiak chetna do an tum thu a sawi. Cabinet meeting thuchhuak puanzarnaah hian deputy chief minister, Arun Sao leh Vijay Sharma te pawh an awm.

Vishnu Deo Sai hi Chhattisgarh-a inthlan neih zawh takah khan BJP ticket-in Kunkuri seat aṭanga thlan tlin a ni a, Chief Minister atana ruat a nih hnuah Nilaini khan rinawmna thu tiam tira lak luh a ni.