Congress-in campaign sum khawnna tur tlangzarh

Nakkuma Lok Sabha inthlanpui lo awm tur atana Congress-in campaign-naa sum hman tur mipuite'n an thawh khawmna tur puangin, hei hi ram pum huapa kalpui a nih tur thu an sawi. Congress party sum bawma lut tur 'Donate for Desh' an tih chu Mahatma Gandhi lo kalpui tawh, 'Tilak Swaraj Fund' ang a nih thu an sawi.

Congress party president, Mallikarjun Kharge chuan digital payment hmanga mipuiin pawisa an thawh theihna tur hi tlangzarhin, a sum faia pekna tur, in tina kala an khawnna tur chu December 28 aṭanga an kalpui ṭan tur thu Congress general secretary, KC. Venugopal leh party treasurer, Ajay Maken te chuan an sawi bawk.

December 28 hi Congress din cham vawi 138-na a ni a, hemi cham pual hian Congress chuan Rashtriya Swayamsevak Sangh (RSS) headquarters awmna, Nagpur-ah kawngzawh lian tak buatsaih an tum thu an tarlang a, party hruaitu hlun tak tak bakah mi nuai 10 chuan pung khawm turin an beisei tih an sawi.

Venugopal chuan,"Kan campaign hawn nana 'Donate for behtar Bharat' kan kalpui hi kum 138 kan tlin lawmna a ni bawk a, mipuite chu kan bul ṭanna hriatreng nan, Rs. 138 emaw, 138 ang zela kal a, Rs. 1,380, Rs. 13,800 anga pawisa thawh turin kan sawm a ni. Hei hi India ṭha zawk siam tura kan beihna entirna tur a ni," tiin a sawi. Congress hian campaign sum khawn nan hian channel pahnih siamin, party official website aṭanga a pek theih dawn bakah, webiste an siam, donateinc.in -ah te pawisa hi a pek theih dawn a ni. State tina unit zawng zawng hnenah nakkum Lok Sabha inthlan puala campaign sum khawn tur hi press conference leh social media kaltlanga awareness nei turin an hriattir a, party worker leh volunteer-te pawh target an tlin tur bituk vek an ni bawk.