Parliament House venhimna ngaihtuah tur committee din

Lok Sabha speaker Om Birla chuan December 13-a Lok Sabha beih a nih leh eptu party MP suspend-te chuan inkungkaihna a nei lo tih sawiin, Parliament leh a chhehvel venhimna hna thawh chungchang leh siam ṭhat ngai laite ngaihtuah turin high-power committee din a nih thu a puang.

Speaker hian high level committee chu Union Home Ministry hnuaia din a nih thu leh, CRPF Director - General Anish Dayal Singh-a'n a kaihhruai tur thu sawiin, Lok Sabha beih a nih chungchanga report an buatsaihte House-ah ngaihthlak tura peih vat an tum thu a sawi bawk. Birla chuan,"He committee hian Parliament chhehvela venhimna hnathawh kalpui a nih dan hrang hrangte an thlir dawn bakah, venhimna khauh leh ṭha zawk kalpui a nih theih dan tur chungchangah rawtna te an siam dawn a ni," tiin, House-in beih a tawh ang chu thleng nawn tawh lo tura a duh thu a sawi. December 13-a house beih a ni leh member ṭhenkhat suspend an nih chungchang lo sawi zawm tawk an awm chu zia lo a tih thu leh, thil ṭul lo tak a nih thu a sawi bawk.

Om Birla hian member zawng zawngte hnenah lehkha thawnin, eptu party MP suspend-te chu Lok Sabha beih a nih chungchang House-a an sawi chhuah vang ni loin, House chhunga thuziak keng lut a, harsatna an siam avanga suspend an nih thu a tarlang a ni.