Parliament inkhawm tihbuai chungchangah House-a thu sawi turin Amit Shah an phût

Parliament rorel inkhawm laia Lok Sabha chamber chhunga mi pahnih an tlan lut leh, thil khu an kah chhuah chungchangah Congress party chuan union home minister Amit Shah chu House-a thu sawi turin an phut.

Congress general secretary Jairam Ramesh chuan nimina press conference a neihah, December 13-a Lok Sabha security palzut a nih chungchang chu thil serious tak a ni a, House chhunga misual an tlan lut chungchanga eptuten Home Minister thu sawi an phut avangin rorel inkhawm pawh tihtawp a nih phah fo tih a sawi. Nimina Lok Sabha leh Rajya Sabha inkhawmah pawh eptu member-te Amit Shah thu sawi tura phuta an au bengchhen leh avangin chawhnu dar 2 thleng rorel inkhawm tihtawp a ni leh bawk.

Ramesh chuan prime minister Narendra Modi ngei pawhin December 13-a thil thleng chu ngaihzam mai chi a ni lo tih chanchinbu lian tak pakhat bulah a lo sawi tawh a, Home Minister pawhin TV channel-ah hemi chungchang hi a sawi bawk a ni, a ti. Hetih lai hian House chhunga he thil thleng chungchang sawi tura phutna chu Home Minister hian a la hnar zel a, a mawhphurhna a nih avangin thu hi a sawi ngei a ngai tih a sawi. Home Minister-in House-a thu a sawi duh loh avang hian rorel inkhawm pawh tihtawp a ngaih phah fo a ni, a ti.

Kharge-a'n RS chairman hnenah ngenna thlen

Lok Sabha rorel inkhawm lai mi pahnihin an tihbuai chungchangah, union home minister Amit Shah thu sawi tura phuta House chhunga an au benchhen avangin kar liam ta khan eptu MP 14-te chu Parliament winter session neih mek aṭangin suspend an ni. MP hremte hi Lok Sabha member 13 leh Rajya Sabha member pakhat a ni.

Congress president Mallikarjun Kharge chuan nimin khan Rajya Sabha chairman, Jagdeep Dhankhar hnenah lehkha thawnin, RS member, Trinamool Congress MP Derek O'Brien suspend-na chu sut turin a phut.

Kharge chuan TMC hruaitu hian security palzut a nih chungchangah Home Minister hi House-a thu sawi turin a phut ringawt a, an thil phut hi dan hnuaiah pawh phal vek a ni, a ti. Hetih laia Home Minister zawkin engmah a sawi duh miah lo hi Parliament kalphung bawhchhiatna a ni zawk, tiin a sawi.

Lok Sabha eptu member 33 suspend belh leh

December 13-a Lok Sabha chamber-a thil thleng chungchanga union home minister Amit Shah thusawi phutin nimin khan eptu MP-te an au buai leh a, speaker Om Birla chuan rorel inkhawm tibuaia puhin eptu member 33 te a suspend belh leh.

Speaker-in eptu member a suspend zingah hian Congress leader Adhir Ranjan Chowdhury pawh a tel. Chowdhury hian Pathianni khan Speaker hnenah eptu MP 13-te suspend-na chu sut turin alo ngen tawh a ni.

Eptuten Parliament security palzut a nih dan chhui chian an phut thu leh, Amit Shah thu sawi tura phuta an au bengchhen hnuah Speaker chuan member 33 te hi a hrem a ni. Speaker chuan he thil thleng hi high-level committee in a chhui mek thu leh, eptu lamin an 'politicise' chu ṭha a tih loh thu a sawi. Member-te hrem an nihna chhan chu December 13-a thil thleng vang ni loin, House chhunga danin a phal loh thuziakte an ken lan vang a ni, a ti bawk.