Ruahsurin Tamil Nadu chhim lam tibuai chhunzawm zel

Tamil Nadu chhim lam bial eng emaw zat chu ruahsur nasa avanga tuilianin a tibuai chhun­zawm zel. A bikin Kanya­kumari, Tirunelveli, Thoo­thukudi leh Tenkasi district-ten harsatna an tawk zual a ni.

Chief secretary Shiv Das Meena chuan harsatna tawkte chhanchhuah hna thawk tur hian Army, Navy leh Air Force-te pawh koh an ni a, lawng 84 vel chhawp chhuah a ni bawk tih a sawi. Tuilian tuar mi 7,500 vel chu sawn chhuah ni tawhin, relief camp 84 siam a ni tawh bawk.

NDRF leh State Disaster Response Force, Fire and Rescue Service leh police team-te chuan tuilenna biala mite hruai chhuah hna hi an thawk mek a ni. Tirunelveli-Tiruchendur section-a rel service pawh tihtawp rih a ni a, Madurai leh Ottapidaram inkalpawhna kawngpui pawh tuiin a chîm vek a, Kanyakumari district-a Ozhuginacheri hmuna thlai chìnna hmunte chu tuiin feet 4 thlenga sangin a chîm a ni.