Parliament winter session neih mekah MP 141 suspend an ni tawh

Parliament winter session neih mekah Parliament security palzut chungchangah eptu leh sorkar lam an inbei nasa hle a, House pahnih aṭangin eptu MP 141 suspend an ni tawh. Eptu pawl hruaitute chuan BJP chet dan chu 'democracy tihhlumna', India rama tana hun thim leh sorkarin rorelna a kenkawh theih lohzia lantirtu a ni, an ti.

Thawhṭanni khan Rajya Sabha leh Lok Sabha aṭangin eptu MP 78 suspend an ni a, hei hi India rama nikhat thilthua a ruala MP suspend an tam ber record a ni. Nimin khan Lok Sabha aṭangin MP 49 suspend belh leh a ni bawk. Kar hmasa lama eptu MP 14 suspend tawhte nen, tun ṭum Parliament thlasik ṭhutkhawm neih mek aṭanga MP hrem tawk hi 141 an tling ta a ni. MP suspend-te hi Rajya Sabha aṭangin 46 leh Lok Sabha aṭangin 95 an ni. Rajya Sabha-ah chuan eptu member zinga 50% dawn hrem an ni.

Eptu MP suspend zingah hian Lok Sabha-a Congress leader Adhir Ranjan Chowdhury, DMK floor leader TR Baalu, union minister hlui Dayanidhi Maran leh Trinamool Congress leader Saugat Roy te an tel. Anni bakah Congress hruaitu Shashi Tharoor, Karti Chidambaram, Gaurav Gogoi, National Conference leader Farooq Abullah, NCP hruaitu Supriya Sule leh Sumajwadi Party member Dimple Yadav-te pawh an tel bawk.

December 13-a rorel inkhawm neih laia Lok Sabha chamber-ah gallery aṭangin mi pahnih zuang lutin, dawhkan hrang hrangah tlan kual a, thil khu kap chhuaka rorel an tihbuai chungchangah eptu lam hian union home minister Amit Shah chu House-ah thil thleng hi sawi turin an phut a ni. Mahse Parliament security palzut a nih chungchangah tun thlengin Amit Shah hian House-ah thusawi a la nei lo a, eptu lam hian thu sawi tura phutin rorel thei loin ni eng emaw zat an aubuai tawh a, House chhungah an thil phut lantirina thuziakte an keng lang bawk. Hei vang hian House leader-te chuan eptu member-te hi an hrem a ni.

Congress party president Mallikarjun Kharge chuan eptu pawlte thil phut hote pahnih - security palzut a nih chungchangah House-a Amit Shah thu sawi leh, he thil thleng member-ten sawiho tih chu sorkar lam chuan ngaihtuahsak duh loin, eptu MP-te a hrem zawk a ni, a ti. Prime minister Narendra Modi-a'n chanchinbu pakhatin an interview-ah a sawichhuak tawh a, Shah ngei pawhin TV channel-ah a sawilang tawh bawk a, hetianga pawn lama an sawi chhuak tawh chunga Parliament-ah engmah an sawi chhuak duh lo chu an mawhphurhna hlen duh lohah a puh. Session neih mekah eptu member tam tak suspend an nih avangin, Modi kaihhruai sorkar chua sawihona mumal nei lo leh, anmahni dodaltute rapbet chungin an duh dan angin an rel tawh mai dawn a ni, a ti bawk.

Shashi Tharoor chuan BJP-in rorelna neih chu eptu member-te tel theih lohna tura siam an duh tih chiang takin a rawn lang ta sawiin, India ramah Parliamentary democracy a thi mek a, a sunna ziah a ngai dawn ta a ni, a ti. Union home minister Amit Shah chuan Parliament security palzut chungchang House-ah a sawi duh loh avangin, Parliamentary democracy innghahna chu a bawhchhia a ni. Hetih lai hian House pawn lamah, media ho bulah a sawi lang tho si a ni, a ti.

Congress MP Karti Chidambaram chuan India Parliament chuan North Korea Assembly a ang chho dawn tiin, 'A la an lohna awmchhun chu Prime Minister a rawn kal luh laiin kut an lo beng lo tih chauh a ni tawh," tiin a sawi.