Gujarat lei chim thubuaiah a cheitu firm hotu bail dilna hnawl

Gujarat High Court chuan nikum October 30-a mi 135 in an thih phahna, Morbi suspension bridge chim chungchanga mawhphurtu bera puh, lei siamṭhat hna thawk Oreva Group CMD Jaysuk Patel bail dilna chu a hnawlsak.

Lei chim chungchanga thubuai ziah luh a nih hnuah, kumin January thla khan Patel hi thuneitute kutah a inpe a ni. A hmain regular bail a dilna chu court hniam zawkten an lo hnawlsak tawh bawk.

Patel-a firm, Oreva Group hian British ho hunlaia siam, Gujarat-a Morbi khuaa Machchhu lui-a suspension bridge chei leh thawm ṭhat hna a thawk a ni. Mahse an lei chei ṭhat hi an hawn hnu lawkah a chim a, mi 135 an thih phah bakah, hliam mi 56 an awm bawk. Hei vang Patel leh midang pakuate chu Indian Penal Code-a section hrang hrang hnuaiah thubuai siamsak an ni. Thubuai siamsak zinga mi pali hi jail-ah an tang mek a, an zingah hian Orva Group manager leh, repair work thawktu firm Devprakash Solutions neitu pahnihte pawh an tel.