Bengal-a Left leh Congress thawhpui turin Banerjee inhawng

West Bengal chief minister leh Trinamool Congress hotu, Mamata Banerjee chuan West Bengal-a Congress leh Left party-te thawhpui turin Trinamool Congress chu a inhawng tih a sawi. Hemi rual hian nakkum Lok Sabha inthlanpui neih tur atan, eptu ṭangrual pawl INDIA-in PM candidate an neih lawk chu a duh lo tih a sawi bawk.

Banerjee hi INDIA block meeting-a tel turin Delhi-ah a cham mek a ni. Chanchinbu miten an kawmnaah, Banerjee chuan Bengal-a party pathum, Left-Congress-TMC thawhhona turin a inhawng tih a sawi a, TMC chuan an thawhpui theih vek tur thu a sawi.

INDIA-in common Prime Ministerial candidate a neih chu a duh lo tih TMC hotu hian a sawi bawk a, hei chu inthlan neih zawh hnuah ngaihtuah tura a duh tih a tarlang. TMC chuan eptu pawlte lungrual taka an thawhho theih a duh tih sawiin, party hruaitute an lungrual theih phawt chuan, BJP duh lo a, paihthlak duhtu voter-te chu an lungrual ve nghal mai dawn a ni, a ti. INDIA hnuaia party hrang hrangte seat insem dan tur chungchang pawh ngaihtuah hmasak ber a ngai lo tih sawiin, ram mipuite chu dah pawimawh hmasak phawt tur, a ti bawk.