Eptu MP tam tak suspend an nih laia BJP MP pahnih hrem an nih ve loh chhan zawt

Parliament winter session neih mekah, Lok Sabha rorel inkhawm lai pawn lam miten an tihbuai chungchanga eptu member-ten House-a union home minister Amit Shah thusawi tura phuta an aubuai avangin member 141 suspend an ni tawh. Hetih lai hian buaina chhuah chhan bulpui pahnih, BJP MP pahnihte suspend an ni ve lo leh, an chunga action lak a nih miah loh chhan eptuten an zawt.

BJP MP pahnih, hrem tura an phutte hi Ramesh Bidhuri leh Pratap Simha te an ni. Bidhuri hi Amrohan MP Danish Ali laka ṭawngkam mawi lo leh chhe tak hmangtu a ni a, Simha hi kar liam taa Lok Sabha chamber-a lut a, rorel inkhawm tibuaitu mi pahnih zinga pakhat hnena visitor pass petu a ni.

Sorkar lam chuan Lok Sabha inkhawm tibuaitu leh pawn lama an thurualpui, mi parukte chu anti-terror law hnuaiah thubuai a siamsak tawh a, hetih lai hian visitor pass petu MP chungah erawh action lak a ni lo.

BJP MP Ramesh Bidhuri hi House chhunga Ali laka a ṭawngkam mawi lo tak avangin Lok Sabha privilege committee chuan chhui zuiin, MP pahnihte hi tun thla tir lam khan panel hmaah an lo inlan tawh a ni. BJP member-te chuan Ali hi prime minister Narendra Modi laka ṭawngkam mawi lo hmangah an puh ve thung . Defence minister Rajnath Singh chuan Bidhuri ṭawngkam hman duh dan chu pawi a tih thu a lo sawi tawh bawk. Mahse Bidhuri hi hrem a ni lo a, Ali zawk hi MP suspend zingah a tel thung.

PM leh BJP-in single partry rule siam an tum : Kharge

Congres president Mallikarjun Kharge chuan Parliament aṭanga eptu member tam tham tak suspend an nih chungchangah, prime minister Narendra Modi leh BJP chuan party pakhat rorelna, single party rule siam an duh a ni, a ti.

Mallikarjun Kharge chuan a X-ah, "BJP MP, misualte House chhung an luh theihna atana ruahmanna siamsaktu chu tun thlengin zalen taka awmin, thu zawhfiah pawh a la ni lo. Parliamentary security chungchanga mawhphurtu officer-te pawh mawh phurh tir an ni lo bawk. Hei hi eng ang chhuizuina nge ni?" tiin a zawt. Security palzutna nasa tak awmah hian a thuneitu lam hrem loin, eptu MP-te dikna chanvo chhuhsakin an hrem zawk a, a mawhphurtu tak zawkte chu an him ta zawk a ni, a ti.

"Prime Minister leh a party chuan kan ramah 'single party rule' siam an tum a ni a, democracy nuaibona tur nena in ang , 'Ek Akela' tih an sawi ṭhin. Hemi ang chiah hian eptu MP-te suspend-in an rawn ti ta a ni" tiin a sawi.