Vice President post hmusitna ngaihzam a ni dawn lo : Jagdeep Dhankhar

Rajya Sabha chairman leh India vice president, Jagdeep Dhankar chuan Trinamool Congress (TMC) MP pakhatin Parliament-ah a tihdan a zir leh, Congress MP-in a lo record chungchangah, Parliament leh Vice President post hmusitna chu ngaihzam a ni dawn lo tih a sawi.

Jagdeep Dhankar chuan a tihdan zir leh, video-a lo lak chu vice president post hmusitna chauh ni loin, a hnam leh loneitute thlenga hmusitna lantirna a ni, a ti. "Tupawhin Jagdeep Dhankar chu lo hmusitin lo deusawh mah se min ti buai lo, mahse ka post zahawmna erawh ka humhim zel dawn a ni," a ti.

Hetih lai hian Rajya Sabha chairman tihdan zirtu, TMC MP Kayan Banerjee chuan midang rilru tihnat tuma ti a ni lo tih a sawi. "Tuma rilru tih nat ka tum lo. Mahse zawhna erawh ka nei. Jagdeep Dhankhar hi Rajya Sabha-ah hetiang tak hian a awm ngai em tih hi. Mi tihdan zir hi art chi khat a ni a, Prime Minister ngei pawhin kum 2014-2019 inkar khan a lo ti ṭhin a ni," tiin a sawi.

Dhankhar-a'n mimal taka inbeihna leh, a hnam leh loneitute thlenga hmusitna a ni tia a sawi chu Congress party president Mallikarjun Kharge chuan chhangin, "Hetiang zawng hian sawi tur a ni lo a, midang fuihpawrh zawnga thiltih hi pumpelh hram tur a ni," a ti. Kharge chuan Dalit hnam a nih avangin amah ngei pawhin hnam inhmusitna lam hawi a tawn fo thu leh, hnam bil hmusitna ti zawnga a ṭawngchhuah ngai loh thu a sawi ve bawk.