INDIA-in criminal law bill court-ah khin tum

Eptu party intel khawm, Indian National Developmental Inclusive Alliance (INDIA) chuan Lok Sabha-a criminal law bill pass tak pathum; Bharatiya Nyay (Second) Sanhita Bill, Bharatiya Nagarik Suraksha (Second) leh Bharatiya Samanta (Second) te chu Supreme Court-a khin an tum.

Nilaini khan Congress party president, Mallikarjun Kharge kaihhruaina hnuaiah INDIA-a thawkho party hrang hrang hruaitute chuan meeting neiin, criminal law bill thar chungchang hi an sawiho a ni. INDIA-a tel party-te chuan bill thar an duh loh thu hi an sawi a, heng bill thara dan siam ṭhenkhat chuan India ram chu police lalna ramah a chhuah thei dawn niin an sawi.

Congress general secretary, Jairam Ramesh pawhin X-ah post chhunzawmin,"Home Ministry chuan sawihona mumal pawh awm loin dan ṭha lo tak pathum an pass a, Rajya Sabha-ah pawh pass a ni leh thuai ang. Hetiang a thlen theih chhan hi house pahnih aṭanga INDIA MP 144 lai suspend an nih aṭang khan a hriatthiam theih a ni," tiin, sorkar laipui chu bill an pass duh avanga eptu party MP-te suspend-ah a puh. Ramesh hian Parliament-a dan lam thiam ber berte ngaihdan pawh an la lo niin sorkar laipui chu a puh bawk. Congress hian an party chhunga dan lam thiamna bik nei; P. Chidambaram, Abhishek Singhvi leh Tewari te chu house pahniha bill sawihonaah hian tel tur leh ngaihtuahna thar pe thei tura beiseina nei mah se, eptu party MP tam tak suspend an nih avangin bill sawihonaah hian an tel thei lo a ni.