Eptu MP ṭhahnem tak suspend an nih avangin kawngzawh

Lok Sabha leh Rajya Sabha aṭanga suspend tawk, eptu MP eng emaw zat chuan nimin khan Parliament building hlui aṭanga bul ṭanin, Delhi khawpui laili, Vijay Chowk thleng lungawi lohna lantirin kawng an zawh. MP kawngzawhte hian democracy thih mek thu leh chhan a ngaih thu inziahna thuziak chi hrang hrang an keng.

Kar hmasaa Lok Sabha inkhawm neih laia beih a nih chungchangah, Lok Sabha-a venhimna hnathawh dan leh sawi fiahna phutin eptu party-te leh rorel lai BJP te chu an inhnial buai a, House chhunga che mawi lo tiin eptu party MP 140 chuang chu Lok Sabha leh Rajya Sabha aṭang hian suspend an ni. Eptu MP-te hian prime minister Narendra Modi leh union home minister Amit Shah te chu hemi chungchang house-a sawi tur hian an phut a, mahse, an pahnih hian ram himna chhuanlamin house-ah hian engmah an la sawi lo.

Kawngzawh chungchangah hian Congress president Mallikarjun Kharge chuan,"Parliament-a venhimna hi thuam ṭhat kan duh a, kan duhnate sawina hun min pe turin Lok Sabha Speaker leh Rajya Sabha Chairman kan ngen mai a ni. PM Modi leh Home Minister pawhin house-ah khan thu sawi ve mai se, PM hian hmun dangah thu a sawi leh tho bawk si," tiin an lungawi loh chhan a tarlang. Kharge hi MP suspend la ni ve lo tlemte zinga mi niin, INDIA-in vawiin hian Jantar Mantar-ah nawrh huaihawt chhunzawm an tum niin a sawi bawk.

Parliament-a venhimna hna thawh dan chungchanga house pahnihna inhialna nasa tak thlengah hian MP 143 suspend an ni tawh a, Trinamool MP, Kalyan Banerjee chu Rajya Sabha chairman, Jagdeep Dhankhar a deuhsawh avangin MP suspend hnuhnun ber a ni.