Parliament beih kaihhnawihah Karnataka DSP fapa man

Delhi police chuan Parliament beih chungchang an chhuina kal zelah Nilaini zan khan Karnataka-a Deputy Superintendent of Police (DSP) fapa, Saikrishna Jagali chu manin, police-te hian thu zawh fiah turin an la.

Jagali hi Karnataka-a Vidyagiri district khawpui, Bagalkote-a khawsa a ni a, Bengaluru-ah multinational company pakhat hnuaiah a thawk mek a ni. Man a nih chungchangah hian police-te chuan Jagali hi Lok Sabha inkhawm tibuaia lut zinga mi, Manoranjan D nen inkawm ṭhin niin an sawi a, college kal laia roommate ni ṭhin an ni bawk niin an sawi. Jagali farnu, Spanda chuan an ina Delhi police lo kal thu leh a nuṭapa an lak thu hi sawiin, Manoranjan nen hian roommate ni ṭhin mah se tunah chuan in aṭanga hna a thawh thu sawiin, a nuṭapa chuan engmah tihsual a neih loh thu a sawi bawk. Delhi police-te hian Jagali bakah hian Uttar Pradesh aṭangin mi pakhat an man bawk a, hei erawh a nihna hriat a la ni lo a, police-te hian thu zawt fiahin an kawl mek bawk a ni.

Police-te hian an mi mante pahnih hi Facebook page delete tawh, Bhagat Singh Fan Club zinga mi nia an hriat thu sawiin, he page hi Parliament tibuaitute'n parliament an beih hmaa an siam niin an sawi.