India-ah Covid chi thar kai mi 2,669 tling tawh

Covid-19 chi thar, JN.1 an tih chuan khawvel ram hrang hrang tuam leh ṭanin, India ramah pawh he Covid-19 chi thar kai hi mi 2,669 an awm mek niin health ministry chuan a tarlang.

Nimina sorkar thuchhuahin a tarlan danin, darkar 24 chhungin Covid kai thar hi mi 358 awmin, heng zinga 300 hi Kerala-a mi an ni a, thihpui mi paruk an awm tawh bawk a ni.

Union minister of health and family welfare, Dr. Mansukh Mandaviya chuan Covid-19 chi thar leng chungchanga India dinhmun thlir nan high-level meeting a ko a, hri leng vil dan tur leh, a darh tur venna tur te an sawiho a ni. Union Health Minister hian state zawng zawngte chu inralring tura hriattirin, damdawi leh oxygen cylinder bakah, ventilator leh vaccine te inla ngah turin a hriattir. State zawng zawng hian mipuite hnenah awareness pe ṭha se la, hri darh tur venna kawnga hmalakna mumal tak neiin, thudik lo thang tur ven thlengin an thawh uluk hle a ngai niin a sawi bawk.

Covid chi thar leng mek chungchangah hian World Health Organisation (WHO) chuan hlauhawm lutuk a nih loh thu leh, invenna erawh uluk a ngaih thu a sawi. Covid chi thar symptoms an puan zingah; khawsik, hnap tui tam, hrawk thip, lu na, luak chhuak nasa, chau leh ruh na bakah, pum leh kaw lam fel lo te a awm theih thu an tarlang. WHO chief scientist hlui, Soumya Swaminathan chuan JN.1 chu Omicron aṭanga lo chhuak a nih thu sawiin, Covid-19 hmasa te anga hlauhawm em em ni lo mah se hun rei zawk atana hriselna ngaihtuah chunga inven tluk erawh a awm loh thu a sawi.