A hun hmain parliament inkhawm titawp

Rorel lai party, BJP leh eptu party-te inbeihna nasa tak karah parliament thlasik inkhawm chu December 22-a tawp tura ruahman ni mah se December 21 khan tihtawp a ni.

Parliament thlasik inkhawm hi December 4 khan ṭan a ni a, Lok Sabha speaker Om Birla chuan session neih a nih chhungin starred question 55 chu kaa chhan hman a ni a ti a, rule 377 hnuaiah thil chi hrang hrang 256 sawiho hman niin, lehkha 1,930 pharh hman a ni a ti. Lok Sabha thlasik inkhawm hi darkar 61 leh minute 50 awh a nih thu sawiin, sitting vawi 14 an nei hman a, session neih a nih chhung hian Birla chuan bill 18 an pass hman thu sawiin, British-te'n India an awp hunlaia misual hremna dan an duan, Indian Penal Code, the Code of Criminal Procedure, the Indian Evidence Act te thlakna tur atan Bharatiya Nyaya Sanhita 2023, Bharatiya Nagarik Suraksha (Second) Sanhita, leh the Bharatiya Sakshya (Second) Sanhita bill te chu pawm a nih thu a sawi.

Rajya Sabha chairman, Jagdeep Dhankhar pawhin darkar 65 chuang inkhawm an neih chhungin sitting vawi 14 a awm hman thu a sawi a, zawhna 2,300 chuang chhan niin, lehkha 4,300 chuang pharh a ni bawk niin a tarlang. Rajya Sabha-ah hian bill 17 pass hman a ni.

Tun ṭuma parliament thlasik inkhawm hi India history-a parliament-a eptute leh rorel lai party-te inbeihna a nasat ber ṭum tiin an sawi a, December 13 khan Lok Sabha inkhawm neih laiin Lok Sabha hi mei khu hmanga tihbuai a ni. Hemi thubuai kal zelah hian a bul tumtute chu man vek ni tawh a mah se, eptu party MP te aṭanga house venhimna chungchanga rorel lai au elna leh thil ṭhenkhat phutna a nasat avangin eptu party MP 146 lai chu suspend an nih phah bawk. MP suspend zingah hian INDIA tiha eptu party intel khawmte MP 139 zinga 99 lai an tel a ni. Hetih lai hian Trinamool Congress MP, Mahua Moitra chu tun thlasik inkhawmah khan, parliament ethics committee-te report theh luh aṭanga a chungchang sawiho a nih hnuah Lok Sabha MP a nihna aṭangin disqualify a ni bawk.