Dan thar hnuaiah doctor-te kum hnih tang thei dawn

Parliament-in Indian Penal Code thlakna tur atana bill a pawm tak, Bharatiya Nyaya (Second) Sanhita Bill, 2023 (BNSS) hnuaia section 106(1) siam ṭhatah chuan doctor-te chu an inthlahdah leh ngaihthah avanga thihna a thlenin kum hnih thleng an tang thei dawn a ni.

Union Home Minister, Amit Shah chuan he dan sawi fiahna a neihnaah doctor-te huam dawn lo angin sawi mah se, Bharatiya Nyaya (Second) Sanhita Bill, 2023 (BNSS) hnuaia hremna hian doctor-te chu midang aia hremna nep hlek a pe chauh zawk a ni. Section 106 (1)-ah chuan,"Mi tu pawhin, a hmanhmawh vang emaw, a inthlahdah avanga tualthah tum vang ni loa midang thihna a thlen chuan kum nga thleng tan ina tang tura hrem theih a ni ang a, pawisa chawitir theih a ni bawk ang. Hetiang ang tho hian medical hnathawk registration neite'n midang enkawl hna an thawh laia a thleng a nih chuan kum hnih thleng tan ina tang tura hrem leh pawisa chawitir theih an ni bawk ang" tiin tarlan a ni. He laia 'medical hnathawk registration nei' tih hi a tihdanglamna niin, National Medical Commission Act, 2019 hnuaia hriatpui zirna nei leh National Medical Register emaw State Medical Register hnuaia an hming ziakte a huam thu sawi fiahna tarlan tel a ni.

Indian Penal Code, 1860 hnuaia section 304(A)-ah kha chuan inthlahdah avanga thihna thlengah hian kum hnih tan ina tan leh pawisa chawi emaw, a pahniha hremna pek theih a ni a, tuna bill tharah erawh hi chuan hremna chu kum ngaah tihsan niin, doctor-te tan erawh kum hnih hremna kha la hman chhunzawm tur a ni thung.