Sorkarin Parliament complex ven hna CISF kutah dah

Lok Sabha rorel inkhawm lai beih a nih hnuah, sorkar laipui chuan Parliament building complex ven hna chu Delhi Police kut aṭangin Central Industrial Security Force (CISF) hnenah a hlan. CISF hi Central Armed Police Force (CAPF) niin, Delhi-a sorkar laipui hnuaia ministry building hrang hrang bakah, nuclear leh aerospace domain te, civil airport leh Delhi Metro-te vengtua dah mek an ni.

Sorkar laipuiin ruahmanna thar a siam hnuaiah, CISF hian Parliament building hlui leh a thar chu an veng tawh dawn a, heng hmunah hian airpost security an kalpui dan anga kalpuiin, hand-held detector bakah X-ray machine hmanga en fiahte an nei tel dawn a ni. Security protocol-ah hian pheikhawk, jacket lian leh kawnghrente endik tel vek niin, hengte hi scanner paltlang tur hian tray-ah dahin enfiah zel a ni ang. Tunkar chhung hian CISF-a Government Building Security (GBS) unit expert, fire combat leh response officer bakah, Parliament security team-a official-te chuan survey an nei nghal dawn a ni.

Parliament venhimna hnathawh zawng zawng hi Lok Sabha secretariat-in a enkawl a, bag lo endik leh mi dapte hi Delhi police kuta awm niin, ralthuam chelek a ṭul chuan Central Reserve Police Force (CRPF) hnuaia Parliament Duty Group (PDG) te kuta dah a ni thung. December 13-a Lok Sabha beih a nih avang khan house luh dawna mi dap leh endik hna thawktu zinga mi, Delhi police pariatte chu suspend an ni.