"Covid chi thar avangin booster lak ngai kher lo" : Health Ministry

India rama Covid-19 chi thar, JN.1 kai thar chu mi 656 awmin nimin thleng khan JN.1 kai mek hi mi 3,742 an awm niin Union health ministry chuan an tarlang.

Union health ministry chuan JN.1 chungchangah hian thuchhuah siamin invenna atana vaccine booster lak kher a ngaih loh thu an sawi a, Health ministry hian state zawng zawngte chu covid test nai tam tur leh, positive-te sample theh luh turin an hriattir bawk. India SARS-CoV-2 Genomics Consortium (INSACOG) chief, NK Arora chuan,"Kum 60 chung lam, natna benvawn nei leh hriselna pan deuh, vawiin thlenga vaccine la la lote chuan an duh chuan invenna atan dose thumna an la thei ang. Mipui nawlpui tan erawh dose lina (booster) lak kher a ngai rih lo," tiin a sawi. Arora hian JN.1 lo chhuahna, Omicron variant chu Covid variant dangte aia a nep dehu thu leh, symptoms neite pawhin kar khat chhunga an dampui mai thu a sawi bawk.

Hetih lai hian Serum Institute of India (SII), Pune chuan India-a hman theih turin, JN.1 nena inhnaih tak, XBBI covid vaccine hman phalna dil an tum thu an sawi a, hei hi US Omicron variant covid enkawlna atana an vaccine hman a ni. India hian covid vaccine atan hian Covaxin, Covishield, leh Sputnik-V te a hmang mek a ni.