Motor khalhtute nawrhna transport union dangin zawm

Lok Sabha session hnuhnung ber, December 2023-a neih zawh taka sorkar laipuiin criminal law thlakna tur bill pathum a pawm zinga Indian Penal Code (IPC) thlakna tur, Bharatiya Nyaya Sanhita (BNS) hnuaia lirthei khalhte'n pawi an khawih a hremna dan na tak siam thar duh loin January 1 aṭang khan All India Motor Transport Congress chuan nawrh an huaihawt.

He nawrhna hi nimin khan transport union dangte chuan Jantar Mantar-ah an zawm ve leh a ni. All Dilli Auto-Taxi Transport Congress Union president, Kishan Verma chuan dan siam a nih hmain a nghawng turte rawn hmasak chu sorkar tihtur a nih thu sawiin,"Jantar Mantar-ah hian buaina siam loin nawrh kan huaihawt ang. Heng dan tharte hian chhungkua a tihchhiat vek theih bakah, thi tura hremna tluk an ni. Lirthei khalhtute hian an duh thu renga mi suin an tlanchhe ngai lo, hmun ṭhenkhatah chuan mipuiin kut an thlak hlauin an tlanchhe zawk ṭhin a ni. Ram chhunga lirthei khalhtu pawl hrang hrangte pawhin kan nawrhna hi min rawn zawm zel ang," tiin a tarlang.

Bungraw phur ṭhin, bus leh taxi union hrang hrangte chuan nawrh an huaihawt hi January 30 thleng kalpui an tum thu an puang tawh a, hetih lai hian January 2 khan Union Ministry of Home Aff airs (MHA) chuan All India Motor Transport Congress te hi meeting neihpuiin, an nawrh hi tihtawp an tum thu an puang chhunzawm a ni. All India Motor Transport Congress chairman, Kultaran Singh Atwal chuan nawrh an huaihawt chu inbiakna avangin tihtawp tum mah se, state danga motor khalhtu pawl hrang hrangte chuan an la kalpui chhunzawm tur thu a sawi bawk.

BNS section 106 hian lirthei khalhtute chu tlan chak leh inthlahdah avanga pawi an khawihin kum 10 thleng tang turin a hrem thei a, hei hi ram chhunga lirthei khalhtu pawl hrang hrangte chuan an dodal thu sawiin, nawrh an huaihawt a ni. Union home secretary, Ajay Bhalla chuan All India Motor Transport Congress te nen meeting an neih zawh hnuah,"Sorkar laipui hian dan thar hi a la hmang ṭan lo a ni tih hi kan sawi duh. Chutih rual chuan Bharatiya Nyaya Sanhita (BNS) section 106(2) pawh All India Motor Transport Congress te nena inrawn khawmna neih a nih phawt hnuah chauh hman a ni ang. Bungraw phurtute leh lirthei pawl hrang hrangte nawrh titawp turin ka ngen duh che u a ni," tiin a tarlang.