Transport union-te'n na zawka nawrh huaihawt kalpui an tum thu sawi

Bungrua leh mipui mamawh chi hrang hrang phura eizawng ṭhin lirthei khalhtute intel khawm, All India Road Transport Workers' Federation chuan sorkar laipuiin Bharatiya Nyaya Sanhita (BNS) hnuaia section 106(1) leh 106(2) te chu paih a nih loh chuan nasa zawka an nawrh huaihawt kalpui an tum thu an sawi.

Lirthei khalhtu pawl hrang hrangte chuan All India Motor Transport Congress-in an nawrhna titawp mah se, kalpui chhunzawm zel an la tum thu an sawi. All India Road Transport Workers' Federation general secretary, R. Lakshmaiah chuan sorkar laipui chuan an lungawi lohna thu-ah a beng a chhu ngawng a nih chuan lirthei khalhtute chu na zawka nuar turin a nawr tihna a nih tur thu sawiin,"Thihna hial thlenna chetsualna a awmin lirthei khalhtute chu kum 10 thleng lung in tantir leh Rs. nuai 10 thleng pawisa chawitir an ni ang. Chetsual palh chu chetsual palh a ni mai a, tihluih engmah a awm loh pawhin hrem an ni thei dawn tihna a ni. Lirthei khalhtute zawng zawng chu thlaphang takin an awm reng phah tawh dawn a ni," tiin a sawi. Lakshmaiah hian chetsualna tam zawk chu kawngpui ṭhat tawk loh vang a nih thu te, kawngpui siam dan dik tawk lo te, kawngpui tam tawk loh vang leh khaw chhiat vangte a nih ṭhin thu sawiin, chetsualna thlen ṭhin chhan dik tak ngaihtuah thleng si loa lirthei khalhtute hremna tur ringawt siam a nih chuan rah ṭha a chhuah lo ang tih thu a sawi bawk a ni.

Centre of Indian Trade Union (CITU) chuan lirthei khalhtu pawlte nawrhna chu an thlawp thu tarlang ve bawkin, general secretary, Tapan Sen chuan sorkar laipui chu BNS section 106(2) chungchangah Parliamentary Standing Committee on Home Affairs rawtna pawm lohah a puh. "CITU chuan lirthei khalha eizawng ṭhinte lungawi lohna leh nawrhna hi kan thlawp tlat a, sorkar laipui hian he dan hi hman mai a nih loh tur thu sawi mah se, ennawn emaw siam ṭhat an tum thu an sawi lo thung a ni," a ti.

Lirthei khalhtu pawl hrang hrangte chuan Nilaini aṭang khan Jantar Mantar-ah lungawi lohna lantirin an pung khawm a, 'steering chodo andolan' tiin, lirthei khalh chhuah loh ni hial siama nawrh chhunzawm an tum thu an tarlang. He 'steering chodo andolan' hi state hrang hranga lirthei khalhtu pawl ṭhenkhat pawhin zawm an tum thu an sawi tawh bawk.

Ram chhunga lirthei khalhtute nawrhna hi sorkar laipuiin dan thar a siam, Bharatiya Nyaya Sanhita (BNS) hnuaia section 106(1) leh 106(2) hmanga lirthei khalhtute'n mihring an suta thihna a thlenin, lirthei khalhtute chu kum 5 aṭanga kum 10 thleng lung in tan bakah, cheng nuai 10 thleng pawisa chawitir thei tura hremna siam a nih avanga lungawi lohna lantira nawrh huaihawt an ni.