Ram temple bomb tura vauna kaihhnawihah mi pahnih man

Ayodhya-a Ram temple bomb tura vauna leh Uttar Pradesh chief minister Yogi Adityanath bomb hmanga that tura vauna social media kaltlanga post siam chungchangah Nilaini khan mi pahnih man an ni.

Uttar Pradesh special task force te chuan Ram temple bomb tuma vauna siama puh mi pahnih; Tahar Singh leh Omprakash Mishra, Lucknow, Gomti Nagar-a mite hi an man a ni. Heng mi pahnihte hian nikum November thla khan X-ah, user name @iDevendraOffice tih hmangin Uttar Pradesh chief minister, Yogi Adityanath bakah, STF chief, Amitabh Yash leh Ram temple chu bomb hmang beihah vauna an siam a ni.

Bomb hmanga inbeihna tura vauna hi chhui chian nghal niin, email ID; ‘alamansarikhan608@gmail.com’ leh ‘zubairkhanisi199@gmail.com' tihte chu post siam nana hman a ni tih hmuh chhuah a ni a, email ID-te hi chhui zui nghal a ni a, Tahar Singh hian email hi siamin, Omprakash Mishra hian vauna hi a thawn chhuak nia hriat a ni.