A vawi thum nan Arvind Kejriwal ED hmaah inlan duh lo

Aam Admi Party (AAP) hruaitu leh Delhi chief minister ni bawk, Arvind Kejriwal chu Enforcement Directorate (ED)-in Delhi excise policy thubuai chungchang an chhuina kal zela ED hmaa inlan tura an kohnaah a vawi thum nan a inlan duh lo.

Kejriwal hi Nilaini khan ED hmaa inlana tur koh a ni a, mahse, Kejriwal hian ED thil tihdan chu tihtirtu awm leh tum nei sa an nih thu sawiin, Rajya Sabha inthlan lo awm tur leh Republic Day lo awm tur atana inbuatsaihna thila a buai avanga a inlan theih loh tur thu lehkhain a hriattir a ni. Lehkhaah hian koh a nih chhan a hriatthiam loh thu leh, thuhretu nge rinhlelh a ni ve tih chu hriattir a nih loh thu te, a chungchang thu ang chu tun hma pawhin court-in a lo hnawl tawh ṭhin chu a tarlang bawk. "Kum hnih lai thubuai chhui a nih hnuah engvanga inthlan dawn hnaih chauha inlan tura tih nge ka nih," tiin Kejriwal chuan ED chu hmanrua leh Lok sabha inthlan atana a inbuatsaih theih lohna atana amah beihna nia a ngaih thu a sawi.

BJP pawhin Arvind Kejriwal hi ED hmaa a inlan duh loh avang hian hruaitu eiru leh hrem ngai a ni tiin an bei a, ED thil tihdan chu dik loa a hria a nih chuan court-a khing mai turin an hrilh bawk. Delhi BJP president, Virendra Sachdeva chuan ED hmaa inlan tura vawi thum lai mai a tlanchhia leh a tlanchhiat chhuanlam chu a nep hle a ni a ti.

Hetih lai hian ED hian Arvind Kejriwal in hi an dap tawh a, ED hmaa inlan tura hriattirna hi a vawi lina atan an buatsaih leh mek niin an sawi. Delhi excise policy kaihhnawih thubuaiah hian AAP hruaitu; Manish Sisodia, Sanjay Singh leh Satyendra Jain te chu man an lo ni tawh a ni.