India-in Nepal tan vbc 1,000 pe dawn

Ni hnih cham tura Nepal-a zin, External Affairs Minsiter (EAM), S. Jaishankar chuan nikuma Nepal-a lirnghing avanga chhiatna thlengin a tihchhiatte siam ṭhat lehna tur atan India chuan Rs. vbc 1,000 a pek tur thu a sawi. Jaishankar hian nimin khan Nepal Foreign Affairs minister, NP Saud nen Kathmandu-a hmasawnna hnathawh tur project hrang hrang leh Tribhuvan University Central Library sakna tur atan lungphum an phum dun a ni.

Jaishankar hian thu sawiin, nikum November thlaa Nepal ram thlang lama lirnghing avanga chhiatna thleng chu pawi a tih thu sawiin,"Prime Minister Narendra Modi pawhin Nepal mipui leh hruaitute a tawrhpui tak zet a, Nepal ṭanpuina atan hian theihtawp a chhuah bawk a ni. Kan Prime Minister nen pawh hian kan inbe tawh a, ṭanpuina pek chungchang hi kan sawi dun a, lirnghingin a nghawng leh tihchhiat hmun tam taka siam ṭhat hna kalpui lehna atan Rs. vbc 1,000 pek hi kan remti tawh a ni" a ti. Jaishankar hian Nepal mipuite tana an din reng thu leh, Nepal hruaitute pui tura an inpeih reng thu sawi tel bawkin, Modi kaihhruaina hnuaiah India leh Nepal inṭhianṭhatna tihṭhat zel chu an ngaihpawimawh thu a sawi bawk.

EAM Jaishankar hian Ningani khan Nepal hi a thleng a, a thlen ni hian Lord Shiva tana buatsaih Pashupatinath temple-ah ṭawngṭaina hun hmang hmasa berin hemi hnu hian Nepal ram hruaitu hrang hrangte kawmin hun a hmang leh a ni. Nepal ram hruaitute nen hian inkalpawhna chungchang bakah Nepal-in India tana power MG 10,000 a leitirna turte a sawipui a ni.