SC-in SNJPC kalpui dan endik turin High court-a panel din turin hriattir

Supreme Court chuan Second National Judicial Pay Commission (SNJPC) anga judicial officer zawng zawngte'n, hlawh, pension leh hamṭhatna hrang hrang an dawn turte an dawn ngei theihna tur atana hma la turin high court zawng zawngah member pahnih awmna panel din turin a hriattir. Chief Justice of India, DY Chandrachud kaihhruai bench chuan he rawtna hi siamin SNJPC inkaihhruaina hi pawm tawh a ni a, bench-ah hian Justices J.B. Pardiwala leh Manoj Misra te pawh an tel a ni.

Supreme Court hian All India Judges Association leh mi ṭhenkhatin judicial officer hlawh leh an service chungchanga harsatna an thlen a ngaihtuah a, SNJPC-ah hian judicial officer thawk lai leh bang tawh te paw'n medical exam tih nan sum fai ni lo hamṭhatna an dawn tel theih tur thu a sawi. SNJPC hian hlawh siam dan phung leh pension bakah, chhungkaw pension leh hlawh lakte pawh a huam dawn a, district judiciary te service chungchang pawh a khawih tel dawn bawk a ni.

Thutlukna hi puanzar la ni lo mah se CJI chuan high court zawng zawngin member pahnih; high court judge ni lai awmna panel din a nih tur thu leh panel chuan SNJPC kaihhnawiha judicial officer thawk lai leh bang tawh te harsatna leh ṭul dang zawng zawng an ngaihtuah tur thu a sawi a ni. High court-a registrar general chu panel-ah hian ex-officio secretary a ni nghal dawn a, nodal officer atan district judge hlui an awm dawn bawk a ni. SNJPC dik taka kalpui a nih leh nih loh endik leh kalpui chu panel hna ber tur a ni dawn a, chairperson atan high court chief justice rawt, high court-a judge senior ber a ni dawn a ni tiin CJI hian a sawi bawk. Supreme Court hian SNJPC hi ṭha taka kalpui a ni em tih chu April 7-ah report mumal tak theh lut leh vek turin panel din turte chu a hriattir bawk.