Congress-in state pariatah election committee din

Congress chuan Lok Sabha inthlanpui lo awm tur inbuatsaihna atan state pariatah election committee dinin, heng state zingah hian assambly inthlana hnehna an chan zawh lohna, Madhya Pradesh leh Rajasthan pawh a tel.

Congress party hian official thuchhuah siamin,"Congress president chuan state election committee dinna tur rawtna pawm tawhin, heng; Rajasthan, Kerala, Telangana, Chhattisgarh, Himachal Pradesh, Nagaland, Manipur leh Tripura-ah te hian election committee din a ni ang. Madhya Pradesh bikah hian political affairs committee din a ni dawn bawk a ni," tiin an tarlang.

Rajasthan-ah hian Pradesh Congress Committee (PCC) chief, Govind Singh Dotasra chu election committee chiarman atan ruat a ni a, ani bakah hian chief minister hlui Ashok Ghelot leh union minister hlui, Sachin Pilot bakah Jitendra Singh te chu committee-ah hian an tel bawk. Tin, Kerala election committee chairman atan hian K. Sudhakaran ruat a ni a, Telangana-ah hian chief minister, A. Revanth Reddy chu chairman atan ruat a ni ve bawk. Himachal Pradesh election committee chairman atan PCC chief, Pratibha Singh ruat a ni a, Chhattisgarh election committee chairman atan PCC chief, Deepak Baij ruat a ni bawk. Manipur election commitee chairman hi K.Meghchandra Singh niin, Nagaland-ah S. Supongmeren chu chairman a ni. Madhya Pradesh bikah hian election committee chairman atan Jitu Patwari ruat niin, political affairs committee hi state AICC in-charge; Jitendra Singh-a'n a kaihruai thung dawn a ni.

Inrinni vek khan Congress hian 2024 lok Sabha inthlan atana an party inbuatsaihna leh inpuahchah dante thlir a, vil turin screening committee panga an din bawk a, he screening committe hnuaiah hian state zawng zawngte chu cluster pangaah ṭhen niin, cluster tinah hian Congress hruaitu hlun pakhat chu chairperson-a dah tur niin, member dang pahnih ruat an ni dawn bawk a ni.