Khaw vawt avangin Delhi-a sikul ṭhenkhat chawlh chhung pawhsei a ni

Delhi sorkar chuan thuchhuah siamin, nursery aṭanga pawl 5 thleng zirlaite tan, winter break chu January 12 thleng pawhsei a nih thu an puang.

Delhi minister, Atishi chuan X-ah he thu hi tarlangin, sikul chawlh chhung chu ni 5 chhung pawhsei a nih thu hi a sawi a,"Khaw awm danin a zir loh avanga khua a vawh em avangin nursery aṭang pawl 5 thleng chu ni 5 chhung an chawl chhunzawm ang," tiin a tarlang. Delhi sorkar hian thuchhuah an siam hmasak zawkah government-aided leh unaided recognised private sikul te tan winter break hi January 10 thleng pawhsei a nih thu an tarlang a, hei hi a hnu lawkah rawn sut lehin, thuchhuah an siam hmasak chu tihsual palh a nih thu sawiin, nursery aṭanga pawl 5 chin thleng chauh tan hian chawl hi an rawn pawtsei ta zawk a ni.

Delhi-ah hian khua a vawt zual hle a, khaw vawt hian zual lam a la pan zel zawk a ni. Delhi bakah hian khaw vawt hian Rajasthan chhak leh leh hmarthlang te a tuam tel a, Haryana leh Punjab pawhin khaw vawt hi an tuar tel bawk. Indian Meteorological Department (IMD) chuan khaw vawt hian zual lam a la pan dawn niin an tarlang. Delhi leh a chhehvel state-a khaw lum lai ber hi 9-16 degree celcius a ni pha chauh a, khaw vawh zual lai chuan 4-9 degree celcius a ni deuh ber a ni.