Halal chuanna zawrh khap khinna chungchangah SC-in UP sorkar chhanna nghak

Uttar Pradesh sorkarin November 18, 2023-a thawn chhuah tur ni loa an state chhunga Halal chuanna zawrh chhuah khapna a tihchhuah dodalna atan petition theh luh a ni a, petition hi Supreme Court-in a ngaihtuah hnuah Uttar Pradesh sorkar chu insawi fiah turin a hriattir.

Halal chuanna khap a nih chungchanga dodalna petition hi Justice BR Gavai ṭhut, Supreme Court bench chuan a ngaihtuah a, petition theh luttu, khawvel pum huapa halal pawmpuina certificate pe chhuaktu ni bawk; Halal India Private Limited chuan Uttar Pradesh sorkarin halal chuanna zawrh khapa an laka FIR an theh luh chuan khawtlangah chi inhuatna a thlen thu an tarlang. Halal India aiawha Ukil ding, Ejaz Maqbool chuan Uttar Pradesh sorkarin khapna a tihchhuaha mipuiin halal chuanna thil siamte avanga an lei tur quality ṭhat tawk leh tawk lohah buaina an tawk tih chu dawt mai a nih thu leh, Islam sakhaw beihna a nih zawk thu a sawi. Maqbool hian,"Company-in halal certificate lem pe chhuak leh, mahni hlawkna atana mipui bum anga sorkarin thubuai a theh luh pawh hi dawt leh fiahna awm lo thil a ni," tiin, Uttar Pradesh sorkarin khapna thupek a chhuah hnuah dan dik taka sumdawngte'n harsatna an tawh nasat thu a tarlang bawk.

Uttar Pradesh sorkara Food Safety and Drug Administration, office of commissioner chuan nikum November 18 khan Food Safety and Standards Act of 2006 ṭanchhanin state chhunga halal chuanna thil reng reng zawrh, kawl leh siam khapna thupek hi a chhuah a ni. He khapna thupek dodal hian petition eng emawt zat a lut tawh a, petition ngaihtuahtu Supreme Court hian Uttar Pradesh sorkar hi state chhunga halal chuanna thil siamchhuah zawrh khap a nih chhan leh khapna avanga harsatna thlengte court-a thlen turin a hriattir a ni.