India leh Saudi Arabia-in Haj agreement ziak

Minority Affairs Minister, Smriti Irani leh Minister of State for External Affairs, V Muraleedharan te chuan Jeddah, Saudi Arabia-ah Saudi Minister of Hajj and Umrah, Dr. Tawfiq bin Fawzan hmuin, kum 2024 atana Haj hmanna tur ruahmanna siamin, inremna thuthlung (Haj agreement) an ziak. Haj agreement-ah hian Saudi Arabia hian India aṭanga sakhaw hmun thianghlim tlawhtu (pilgrims) mi 1,75,025 an neih phalsak a ni.

Sorkar laipuiin thuchhuah a siamah hian 2024 Haj atan hian pilgrims 1,75,025 an kal phal a nih thu leh, heng zinga seat 1,40,020 te chu Haj committee kaltlanga reserved niin, seat 35,005 te chu private operator kaltlanga Haj an kal phalsak an ni dawn thung niin an tarlang. India leh Saudi Arabia-in Haj agreement 2024 an ziah thu hi union minister Smriti Irani chuan X-ah a post bawk a ni. Haj agreement-ah hian pilgrims-te himna leh hriselna an ngaihpawimawh thu leh chumi tihlawhtling tura ruahmanna siam thu te union minister hian a sawi a, Haj hmanga kalte tana awlsamna tur ngaihtuah a, digital-a thil kalpui tumna te sawiho a ni bawk. Smriti Irani leh Muraleedharan te hian Jeddah-a King Abdulaziz International Airport-ah pilgrims te tana buatsaih Haj terminal chu a hmunah an en dun bawk a ni.

Smriti Irani hi ni hnih cham turin Saudi Arabia-ah hian a kal a, Pathianni khan Saudi Arabia-ah hian a thleng a ni. Nimin khan Ministry of Haj and Umrah Affairs buatsaih, Haj and Umrah Conference vawi thumna a hmanpui. Saudi Arabia-ah hian India mi sumdawnna avanga awmte a hmuh dawn bakah, hnathawka awmte kawmna hun a hmang bawk ang.