EaseMyTrip-in Maldives thlawhna booking zawng zawng cancel

India leh Maldives inkar boruak ṭha lo awm mek laia Maldives Minister-te'n Prime Minister Narendra Modi hmuhsitna ṭawngkam an neih hnuah, EaseMyTrip co-founder leh Chief Executive Officer (CEO) ni bawk, Nishant Pitti chuan Maldives-a kal tur, thlawhna booking zawng zawng an cancel thu a puang.

Nishant Pitti chuan X-ah Maldives-a kal thlawhna booking an tihtawp vek thu hi post-in, mahni ram thlawpa an din thu a tarlang a, India ram chhunga Union Territory pakhat, Lakshadweep chu Maldives ang thoa mawi, India-in a neih ve a nih thu tarlang telin, mipuite chu Lakshadweep tlawh turin a sawm nghal bawk.

Nikum November thlaa Maldives president atana Mohamed Muizzu lak luh a nih hnuah Muizzu hian India tlawh loin Turkey leh China a tlawh a, hei hian ram pahnih inṭhianṭhatna tichhe ṭanin, Muizzu hian Maldives-a India sipai awmte chhuak turin a ti zui a ni. Muizzu kaihhruai sorkar hian India nena hydrology pact an neih pawh a tinung chhunzawm duh lo a, kar hmasa khan Maldives-a minister pathum; Mariyam Shiuna, Malsha Shareef, leh Mahzoom Majid te chuan Prime Minister Narendra Modi deuhsawhna ṭawngkam nei lehin, hei hian India leh Maldives inkar a tichhe zual a ni.

Indian eng emaw zat chuan Maldives-a chawlh hmang tura ruahmanna an neih an cancel thu Indian Association of Tour Operators chuan tarlangin, internet lama Maldives zawngtu an tlakhniam nghal thu an sawi bawk. Maldives-in tourist an neih tam ber hi Indian an ni a, nikum December thla thlenga Maldives tourism Ministry-in an tarlan danin, an ram tlawhtu tam ber chu India mi an la ni.