LS seat chuh tur insem chungchangah Congress-in INDIA hruaitute inbiakna neihpui

Congress party senior leader ṭhenkhat chuan state hrang hranga INDIA-a an thawhpui party hruaitute nen Lok Sabha inthlan lo awm tur atana seat insem chungchang an sawipui mek tih Congress chuan an puang.

INDIA hian 2024 Lok Sabha inthlanpui lo awm tur atan hian BJP paihthlak a nih theih nan eptu party candidate anga chuhho a, seat insem an tum a ni. Hemi tihhlawhtlin nan hian member panga awmna, committee on seat sharing an lo din tawh a, he committee-ah hian Mukul Wasnik chu convener a ni. Committee-a member, Ashok Gehlot leh Bhupesh Bhaghel te chuan state hrang hranga party hruaitute an kawmna aṭangin Congress President Mallikarjun Kharge hnenah an rawtna te an lo theh lut tawh bawk a ni.

Congress hian INDIA kaltlanga an thawhpui party hrang hrangte nen hian inbiakna nei mah se, Lok Sabha seat insem thu-ah hian state ṭhenkhatah harsatna a awm thei dawn a, a bikin, Kerala, West Bengal, Delhi leh Punjab-ah te hian seat inchuh boruak a lian ṭan hle a ni. Punjab-ah chuan INDIA-a tel ve, AAP-in boruak nei ṭha an intih avangin party mala LS seat chuh an tum thu an puang a, Delhi leh Punjab LS seat insem chungchangah hian Congress hian AAP hi inbiakna mumal zawk a la neihpui dawn a ni. West Bengal-ah hian Trinamool Congress leh Left party te aṭangin Congress hian thahwpui a zawn a ngai dawn a ni.

Hetih lai mek hian Congress hian ram chhunga Lok Sabha seat 539 atana observer tur an ruatte an puang bawk. Congress general secretary, Jairam Ramesh chuan he thu hi X-ah post-in, constituency tina observer tura an ruatte hming pawh tarlan tel a ni a, list pali dang tihchhuah leh tur a nih thu a sawi tel bawk.