DGP conference-ah criminal law hman dan tur sawiho

Director General of Police (DGP) annual conference chu Janury 7 khan Jaipur-ah neih niin, Prime Minister, Narendra Modi-a'n a hmanpui. He hunah hian criminal law thar pathum hman dan tur chungchang sawiho a ni a, a bikin data dah ṭhat leh venhimna chungchangte ngaihpawimawh a ni.

Nikuma parliament-in a pawm tak, criminal law pathum; Bharatiya Nyaya Sanhita (BNS) - IPC thlakna, Bharatiya Sakshya (BS) - Indian Evidence Act thlakna leh Bharatiya Nagarik Suraksha Sanhita (BNSS) - Code of Criminal Procedure thlakna te hi sorkar laipui chuan hman ṭan theih turin December 25 khan thuchhuah a siam a ni. DGP conference-ah hian PM Modi hian heng dan tharte hi kumin kum tawp hmaa Union Territory (UT) -a hman ṭan tum a nih thu a sawi a, heta ṭang hian a tahtawl zela state-a hman chhoh tum niin a tarlang.

BNSS hnuaiah hian pawikhawihna thubuaiah audio leh video record hmanga hnu chhui leh pawikhawihna record dah ṭhat phal a ni a, conference-ah hian police official-te chuan chutianga data dah ṭhat chu a pawimawh thu leh, ruk bo leh lak chhuah a nih lohna atana him taka kawlna tur ngaihtuah a ṭul thute an sawi a ni. BNSS hian pawikhawihna hnu chhuina audio leh video record hi phal mah se, rang taka magistrate hnena theh lut turin dan a zam thung a ni. Police hotute chuan Crime and Criminal Tracking Network and Systems (CCTNS) hmanga online-a thubuai theh luh leh hnu chhuina report pek te chu hman ṭangkai a nih tawk loh thu te an sawi bawk.