MEA-in India rama Maldives palai a ko

Ministry of External Affairs (MEA) chuan India leh Maldives inkar boruak ṭha lo tak awm mek karah India rama Maldives palai a ko.

India rama Maldives High Commissioner, Ibrahim Shaheeb chu MEA hian koin inbiakna an neihpui a, mahse, MEA hian official-a thuchhuah engmah an nei zui rih lo a ni. Hetih lai hian Maldives khawpui, Male-a Indian high commissioner, Munu Mahawar chu Maldives-a thuneitute chuan an hmu ve bawk a, mahse, Munu Mahawar hian Maldives ram hruaitute nen hian meeting tur ruahmanna nei sa an nih thu a sawi thung. India leh Maldives-in inbiakna an neih mek karah hian Israel embassy pawh inrawlhin, Lakshadweep thlalakte an post bawk a ni.

Nikum November thlaa Maldives president atana Mohamed Muizzu lak luh a nih hnuah India leh Maldives inkar boruak hi a chhe chho ṭan a, kar hmasa khan Muizzu kaihhruai sorkar hnuaia deputy minister pathum chuan social media lamah Prime Minister Narendra Modi diriamna leh hmuhsitna ṭawngkam neiin, hei hian boruak a tichhe zual a ni.