DGCA-in pilot-te duty dan phung thlak

Sumdawng thlawhna khalhtu pilot-te'n an thlawh zin lutuk avanga taksa lama harsatna an tawh an thlen chu Directorate General of Civil Aviation (DGCA) chuan ngaihtuahin an duty dan phung ennawnna a neih hnuah ruahmanna thar a siam.

DGCA hian pilot-te chu kar khata chawlh an neih hun pawhseisakin, zan duty neia an thlawh hun a titlem bawk. DGCA chuan he duty dan thar an siam hi airline zawng zawngte'n June 1 hmaa an hman ṭan vek a phut thu a tarlang bawk. Civil Aviation Requirement(CAR) on Flight Duty Time Limitations (FDTL) dan tharah hian pilot-te chu zanlai dar 12 leh zing 6 inkara thlawhna khalha an duty-in a zawnin vawi hnih aia tam hetiang duty hi an nei tur a ni lo tih a ni a, hei hi a hma chuan vawi ruk a ni ṭhin a ni. Zan duty tih pawh hi zanlai dar 12 aṭanga zing lam dar 5 ni ṭhin chu zing lam dar 6 thleng huamtir a ni bawk.

DGCA chuan,"Zan duty hun chhung chhiar nana zing lama darkar khat belha zing dar 6 thleng kan tih hian duty chhunzawm dan tur siamrem chungchangah remchanna a siam dawn a, tin, mihring taksa harhvan lam a tlakhniam lai ber, Window of Circadian Low (WOCL) a mil chiah bawk avangin, pilot-te chau lutuk tur ven nan chawlh mumal zawk an neih theih phah bawk ang," tiin an thuchhuahah an tarlang.