Orissa HC-in damdawi chawhna lehkhaa hawrawppui hmang turin doctor-te hriattir

Orissa high court chuan state sorkar hnenah thuchhuah siam tura hriattirin, sorkar thuchhuahah chuan doctor zawng zawngte'n damdawi chawhna leh damlo enkawlna thu ziak te chhiar theih hawrawpa ziak turin leh a theih chuan hawrawppui emaw, khawla chhut hmang tura hriattir turin a ti.

High court thutlukna hi kar hmasaa Justice SK Panigrahi-a'n thubuai pakhat rem harsa tih a neih aṭanga siam a ni a, he thubuaiah hian post-mortem neihna report, court-a thu ngaihtuah lai kaihhnawihah en niin, report hi chhiar mumal theih leh hriatthiam a har vang a ni. Thubuai theh luttu hian a fapa pakhat thihna chungchangah sorkar aṭanga zangnadawmna phutin lehkha a theh lut a, a fapa thihna thua post-mortem report an chhiar chhuah theih loh avang hian thubuai ngaihtuah lai hian post-mortem titu doctor chu video call hmanga report chhiartir a nih hnuah court hian thutlukna siamin, rul chuk vanga thi tih an fiah thei chauh a ni.

Hemi hnu hian Justice SK Panigrahi hian,"Doctor-te'n duhdah taka post-mortem report an ziah avang hian court-a thubuai ngaihtuah lai nasa takin a tihbuai phah fo tawh a ni. Court-ah hian heng doctor hawrawp chhiar hi a har ṭhin hle a, thutlukna siam pawh a har phah ṭhin a ni" tiin, mi nazawng chhiar theih loh tura duhdah lutuka thil ziah chu doctor-te chuan an intihhmuh niin a sawi. "He court hian Odisha sorkar hnuaia chief secretary hnenah state chhunga doctor zawng zawngte hriat tura thuchhuah siam turin thutlukna a siam a, doctor zawng zawngin post-mortem report leh damdawi chawhna lehkha te hawrawppui emaw, chhiar theih ngei turin an ziak tur a ni," tiin high court chuan an tarlang.