Kolkata Flyover sak lai a chim

Kolkata-a Flyover sak lai chu nimin khan a chim a, police-te chuan mi 14 thiin midang 78 in hliam an tuar niin an sawi.

Vivekananda Flyover chim hi central Kolkata, Girish Park area-a Ganesh Talkies bula Burrabazar ami a ni a, nimin chhun dar 12 vel khan a chim a, mi 150 vel a delh a ni. Motor eng emaw zat a delh chhe tel bawk.

Chhiatna a thlen hnu hian chhanchhuah hna thawktute an kal nghal a, lei chimin a delhte chu lakchhuah hna an thawk nghal a ni. Chhanchhuah hna thawk tur hian army column 4 tirh an ni a, Medical team 3, ambulance 2, surgeon leh nurse awmna team te an duty nghal bawk a, lei chim thenfaina tur hmanrua nen army engineer team pawh tirh an ni bawk.

NDRF unit pahnih, member 70 awmna pawh flyover chimna hmunah hian chhan-chhuah hna thawktute pui turin tirh an ni. Police, fire brigade leh disaster management mi leh sate an theih angin an pui bawk a ni. Lei chimin a delh, hliam tuarte hi Calcutta Medical Hospital-ah hruai nghal an ni. Nimin Flyover chim hi Chief Minister Mamata Banerjee-i pek project niin, kum 2009-ah siam ṭan niin kum 2010-a zawhfel tura tih a ni. Zawh hun tura hun bituk hi
ṭum 8 zet siamṭhat a ni tawh a, mahse tun thlengin zawhfel a la ni lo.

CM hian chhiatna thleng vang hian West Midnopre-a election rally a neih tur pawh ṭhulhin, lei chimna hmun hi a pan nghal a ni.