Trump-an nau ti tlate hremna pek a rawt

US-a Repulican presidential candidate zinga boruak nei lian ber, Donald Trump chuan mipui sawizui hlawh tak thu a chhakchhuak leh.

Realty TV star, billionaire Donald Trump hian MSNBC-in a kawmnaah hmeichhia nau titlate chu hremna pek ngei ni se a duh thu a sawi a, mahse eng ang hremna tih erawh a sawilang lo. Trump hian pawngsual, nu hriselna dinhmun hlauhthawnawm leh inlaichin hnai tak nih vanga nau tihtlak tih loh chu a pawm theih loh thu a sawi. Trump chuan nau ti tla duhten dikna chanvo an neih thlawptu a nih thin thu a sawi a, mahse a ngaihdan hi a inthlak danglam tawh a ni, a ti.

Nau titlate hremna pek a duh thu Donald Trump-an a sawichhuah hnu lawkah hian, a campaigner chuan a thusawi chungchang hi rawn sawifiahin, Trump hian nau titlatu ni loin, a lo tihtlak saktute chu hrem turin a ti zawk a ni, a ti.

Republican president candidate chuhtu zingah Donald Trump hian hma ala hruai chhunzawm zel. Primary electon zawh hnu, July thlaa an party convention-a nomination hmu tura delegate mamawh zat 1,237 aṭangin degelate 739 a nei tawh a, a dawt-tu Ted Cruz chuan 465 neiin pathumna dinhmuna awm mek Kaisich chuan delegate 143 a nei. Candidate pathumte hian party nominee an chan phak loh chuan an party candidate chu an thlawp kher dawn lo tih an sawi.