Hyderabad University zirlaiten VC ban turin ngen

Univerity of Hyderabad students' union chuan an university chhunga boruak ṭha a awm leh theihna turin Vice Chancellor P Appa Rao chu ban turin President Pranab Mukherjee an ngen.

President Mukherjee-a hnenah lehkha thawnin, zirlai pawl chuan kumin January thlaa university hostel-a Dalit research scholar Rohith Vemula a intihhlum chhanah VC chu mawhphurtu niin an sawi a, hei bakah hian zirlaite chunga kut thlak phalsaktu a ni, an ti bawk.

Students' union president Zuhail KP chuan university dinhmun chhe zel tur ven nan President chu inrawlh tura an ngen thu a sawi.

Zuhail KP chuan President hnenah hian Human Resource Development ministry-in Dalit zirla panga-te hremn an nih chungchang chhui tura a din, member pahnih awmna committee pawhin Appa Rao kaihhruai hnuaiah University thuneitute he thubuai an kalpui dan chu a dik lo tih pawh an hmuchhuak niin a hrilh.

Rohith Vemula intihhlum kaihhnawihah hian Appa Rao hi Scheduled Caste and Scheduled Tribe (Prevention of Atrocities) Act hnuaiah thubuai siamsak a ni a, hei hi judicial commission in a chhui mek thu President hnena an lehkha thawnah hian an tarlang bawk.

Zuhail chuan VC hi a thubuai chhui a nih mek lain, March 22 khan a leave lakte titawpin zirtirtu ṭhenkhat leh BJP thlawp, ABVP zirlai te puihnain a hna a zawm leh niin a sawi. Zirlaiten VC in a hna a zawm an duh lohna an lantir ṭumin police-te koin zirlaite chu na takin kut an thlak a ni. Telangana Police-te chuan nawrh huaihawt zinga mi zirlai 24, professor pahnih leh journalist pakhat an man a, midang eng emaw zat thubuai an siamsak bawk.