INDIA party-te'n Maharashtra-a Lok Sabha seat insem remti

INDIA hnuaia intel khawm eptu party hrang hrangte chuan inbiakna neiin Lok Sabha inthlan lo awm tur atana seat chuh tur insem chungchang sawiin, Maharashtra-a Lok Sabha seat 48 awm chu Congress, Uddhav Thackeray kaihhruai Shiv Sena party leh Sharad Pawar kaihhruai Nationalist Congress Party (NCP) te chuan insem an remtih thu an puang.

Heng party pathumte hi Maharashtra-a Maha Vikas Aghadi (MVA)-a tel vek an nih bakah, Indian National Developmental, Inclusive Alliance (INDIA)-a tel vek an ni bawk. Lok Sabha inthlan lo awm tur atana seat insem chungchang sawihoa meeting an neihnaah hian MVA leh INDIA-a Prakash Ambedkar-a kaihhruai Vanchit Bahujan Aghadi lak luh an pawm bawk. Meeting hi la neih chhunzawm tur a ni a, party tinin an seat chuh tur ṭheuh hi sawifel thawkhat tawh niin, seat 8 vel sawi fel an la ngai thung niin an tarlang.

Meeting neih zawhah hian press mite kawmin, seat an ṭhen sawm dan chungchang zawhnaah thuchhuah an la siam vat tur thuin an chhang. Maharashtra-a Congress in-charge, Ramesh Chenithala chuan harsatna an neih loh thu leh Maharashtra chu Lok Sabha seat chuh tur insem dan tichiang hmasa ber an nih tur thu a tarlang.

Hetih lai hian Congress din, National Alliance Committee (NAC) pawhin Uttar Pradesh-a Samajwadi Party (SP) hruaitu, Ram Gopal Yadav inbiakna an neihpui a, seat insem chungchang erawh an sawipui lo niin an tarlang. Meeting hi January 12-ah neihpui leh an tum thu NAC chuan an sawi a ni.