India leh UK-in inremna pahnih ziak

Ni hnih chama United Kingdom (UK) tlawha zin, Union defence Minister, Rajnath Singh chuan UK secretary of state for defence, Grant Shapps nen inbiakna neiin, inremna thuthlung pahnih an ziah thu sorkar thuchhuah chuan a tarlang.

Rajnath Singh leh Grant Shapps te hian ram pahnihte'n cadet exchange programme an kalpuina tur, Memorandum of Understanding (MoU) leh ralthuam siamna kawnga research and development-a thawh dunna tur Letter of Arrangement (LoA) te an ziak a ni. Research and Development chungchanga LoA ziah hi India-a Defence Research and Development Organisation (DRDO) leh UK-a Defence Science and Technology Laboratory (DSTL) te inkarah ziah a ni.

Ralthuam leh ram venhimna chungchang bakah hian thawhhona tur kawng hrang hrang zawngin meeting neih a nih thu Rajnath Singh chuan a tarlang a. Grant Shapps pawhin India leh UK inkar chu sumdawnna thil mai ni loin, tum leh beisei ang khat neia inṭhianṭhatna a ni a ti. Kum 2002 George Fernandes-a'n UK a tlawh hnuah tun ṭum hi India defence minister-in UK a tlawh lehna hmasa ber a ni.